ديك الجن
24/11/2022
أفضل مساعدة ممكن تقدمها لإنسان (بمن فيهم نفسك) هي إنّك تساعده يلاقي شغل ويشتغل..
مش بس لأنّ الشغل بكفّي حاجات الإنسان المعيشية وبحميه من سؤال الناس.. ولا بسّ عشان الكفاية الماديّة هاي، بتنهي عشرات الأزمات النفسية اللي ممكن تصير بسبب ضيق الحال، لكن بشكل أساسي لأنّ الشغل بمنح حياة الإنسان هيكلها وعمودها الفقري وروحها..
وبعطيه جواب كافي ومرضي لسؤال "شو عم تعمل هالأيّام؟" وبمنحه شعور إنه زيّه زي بقيّة هالخلق، بصحى من النوم الصبح وبروح ينتج شي للناس ويرجع المسا لبيته.. والاندماج الاجتماعي بهذا المعنى اله أثر مهول على نفسية الإنسان..
ضيف على هذا الكلام، إنّه بوجود الشغل، بصير للإنسان تصوّر عن حياته.. ممكن ما يحلّ مشاكل حياته كلها، لكن المهمّ إنه بمنحه هيكل أساسي للحياة هاي.. شكل.. نموذج يشتغل عليه.. نقطة بداية.. وبمنحه كمان فائض من المال، والوقت، والأهمّ فائض من التفكير في إصلاح حياته.. وبقدر شهر بعد شهر يحسّن حياته شوي شوي..
ربّ العالمين بقول "وما خلقت الجنّ والإنس إلّا ليعبدون" صحيح.. العبادة في دار الفناء هاي هي كل شي تقريباً.. لكن عشان تحسّ بكينونتك كإنسان، لازم تصحى كل يوم الصبح وتروح تنتج شي وترجع على البيت المسا.. هذا مو شقاء، هذا هدف حياتك ومعناها.. مهما شكيت من الموضوع..
اشتغلوا، وساعدوا الناس تشتغل..
إرسال تعليق